Արարատ Միրզոյանը կարևորել է Գյումրի-Կարս երկաթուղու գործարկումը
Հոկտեմբերի 18-ին Ստամբուլում արտգործնախարարների մակարդակով կայացած «3+3 ձևաչափով» հանդիպման ընթացքում Արարատ Միրզոյանը կարևորել է տարածաշրջանային խորհրդակցություններն ու շփումները։ Այս մասին տեղեկանում ենք Արտաքին գործերի նախարարության էջից։ Նա նշել է, որ Հայաստանը հետաքրքրված է տարածաշրջանում բոլոր տնտեսական և տրանսպորտային հաղորդակցությունների ապաշրջափակմամբ՝ հղում անելով «Խաղաղության խաչմերուկ» ծրագրին։
Այս նախագծի իրականացման համար կարևոր են չորս սկզբունքներ՝ բոլոր պետությունների ինքնիշխանության և իրավազորության հանդեպ հարգանք, ինչպես նաև հավասարություն և փոխադարձություն։ Իրականացման դեպքում «Խաղաղության խաչմերուկը» կարող է դառնալ գլոբալ լոգիստիկ երթուղիների անբաժանելի մասը՝ ապահովելով ապրանքների տեղափոխման ավելի մեծ արագություն և արդյունավետություն։
Բացման խոսքում նա անդրադարձել է նաև Հյուսիս-Հարավ ավտոճանապարհի Հայաստանի նախագծերին, կարևորել իրանական Չաբահար նավահանգստի օգտագործումը։ Միրզոյանը հայտարարել է, որ արդեն ավարտվել է Հայաստան-Թուրքիա սահմանին գտնվող Մարգարա սահմանային անցակետի շինարարությունը և անդրադարձ կատարել Գյումրի-Կարս երկաթուղու գործարկմանը։
Հայաստանն ու Թուրքիան արդեն պայմանավորվել են համատեղ գնահատել Գյումրի-Կարս երկաթուղով սահմանի անցման տեխնիկական պահանջները։ Հայաստանի և Թուրքիայի միջև Գյումրի-Կարս երկաթուղու գործարկումը Հայաստանի և Ադրբեջանի միջև երկաթուղային կապի հետ միասին անմիջապես արդյունավետ կապ կապահովի Պարսից ծոցի, Սև ծովի, Կասպից ծովի և Միջերկրական ծովի միջև: