Ադրբեջանը շարունակում է ոչնչացնել Արցախի պատմամշակութային կոթողներն ու գյուղերը
Ադրբեջանական կողմը քանդել է Ստեփանակերտ քաղաքի կենտրոնում գտնվող պատմական թաղամասը, որի տները կառուցվել էին 19-րդ դարավերջին և 20-րդ դարի սկզբներին։ Այս մասին կարդում ենք Monument watch կայքում, որը զբաղվում է Արցախի պատմամշակութային կոթողների մշտադիտարկմամբ։
Տները գերազանցապես մեկ, որոշները՝ երկհարկ էին, կառուցված տեղական սպիտակ կրաքարով: 19-րդ դարավերջին տնտեսական կյանքի աշխուժացմամբ պայմանավորված բնակավայրը զգալիորեն վերակառուցվում, կառուցապատվում է Շուշիում գործող քաղաքաշինական կանոնավոր սկզբունքներով: Ստեփանակերտ քաղաքի պատմական թաղամասի տները ակնհայտ նմանություն ունեն Շուշիի պատմական տներին: Տների զգալի մասը կառուցվել է հայ բնակիչների կողմից: Ոչնչացնելով Ստեփանակերտի պատմական կորիզը, ադրբեջանական կողմը ջնջում է քաղաքի հայկական անցյալը, — ասված է հաղորդագրության մեջ։
Արբանյակային լուսանկարներում փոփոխությունը դեռ չի երևում։ Սակայն Տիկտոկի ադրբեջանական օգտատերերից մեկը տեսանյութ է հրապարակել, որտեղ երևում է ամբողջապես փոփոխված փողոցը։
Սա ադրբեջանական կողմի միակ ավերածությունները չեն Արցախում։ Google Earth ծրագրի թարմացված տարբերակները դիտարկելիս կարող ենք նկատել, որ Արցախի մի շարք գյուղեր և եկեղեցիներ հիմնապես ավերվել են Ադրբեջանի կողմից (Քարին տակ գյուղ, Մոխրենես գյուղ, Կանաչ ժամ եկեղեցի, Սուրբ Աստվածածին և այլն)։ Մի շարք պատմամշակութային հուշարձաններ դարձել են վանդալիզմի զոհ։
Փոփոխությունների է ենթարկվել նաև Ստեփանակերտի Հանրապետական մարզադաշտը։
2024 թվականի մարտին Ադրբեջանը պաշտոնապես հայտարարել էր, որ քանդվում է Արցախի խորհրդարանի շենքը։ Հետագայում արբանյակային լուսանկարներից տեսնում ենք, որ ոչնչացվել են նաև «Արմենիա» հյուրանոցը, Ազատամարտիկների միության շենքը։ Խորհրդարանի տեղում Ադրբեջանը վարչական նոր շենք է կառուցում։
Վերջին տեսանյութերում երևում է նաև, որ ամբողջովին վերակառուցվել է Արցախի պետական համալսարանը։ Փոփոխություններ են արվել նաև համալսարանի հարակից բնակելի շենքերում։
Ադրբեջանի նման քաղաքականությունը խախտում է միջազգային մարդասիրական իրավունքի կետեր և համարվում մարդկության դեմ ծանր հանցագործություն։ Հռոմի ստատուտի 8-րդ կետի համաձայն՝ մշակութային ժառանգության ոչնչացումը համարվում է պատերազմական հանցագործություն։