Ալեքսանդր Լապշինը ազատ է արձակվել
«Զվարթնոց» օդանավակայանում ձերբակալված Ալեքսանդր Լապշինը ազատ է արձակվել։ Ոստիկանությունը պարզաբանել է, որ Ալեքսանդր Լապշինին ձերբակալել է ոչ թե Ադրբեջանի այլ Բելառուսի պահանջով։ Այս մասին նշել է, փաստաբան Ռուբեն Մելիքյանը ֆեյսբուքի ուղիղ եթերում։
Խոսքը վերաբերում է ոչ թե Ինտերպոլի գծով այլ, կա՛մ ուղիղ միջպետական համագործակցության շրջանակներում, կա՛մ էլ ԱՊՀ-ի շրջանակներում ձերբակալման պահանջին՝ Բելառուսի կողմից, որի կատարողն այստեղ Հայաստանի դատախազությունն է։
Այս տեղեկությունը հաստատել է նաև ՀՀ Գլխավոր դատախազի խորհրդական Լուսինե Մարտիրոսյանը և նշել, որ Լապշինը ձերբակալվել է Բելառուսի Հանրապետության իրավապահ մարմինների կողմից հետախուզման մեջ գտնվելու հիմքով:
Դատախազի կողմից փաստաթղթերն ուսումնասիրելուց հետո բանավոր հանձնարարվել է Ա.Լապշինին չձերբակալել. ներկայում Լապշինը գտնվում է ազատության մեջ, — գրել է Մարտիրոսյանը։
Իր ֆեյսբուքյան էջում ակտիվ հրապարակումներ է արել նաև Լապշինը։ Սկզբում նա նշել է, որ ձերբակալվել է Ադրբեջանի պահանջով, սակայն հետո արդեն հաստատել է Բելառուսի կողմից հետախուզման մեջ գտնվելու փաստը։
Ինձ մոլորության մեջ է դրել օդանավակայանի ոստիկաններից մեկը, ասելով, որ Նիկոլ Փաշինյանը պատրաստվում է ինձ հանձնել Ալիևին։ Հետո արդեն ոստիկանությունում պարզաբանեցին, որ ինձ ձերբակալել են «Բելառուսի նախագահի պատիվն ու արժանապատվությունը վիրավորելու», «Բելառուսի ժողովրդավարական ճանապարհով ընտրված նախագահին տապալելու կոչեր հնչեցնելու» համար։
Երևանում իմ կալանավորման նախաձեռնողը եղել է Հայաստանում Բելառուսի դեսպան Ալեքսանդր Կոնյուկը։ Նա Բելառուսի գլխավոր դատախազն էր 2017 թվականին։ Հենց նա է ստորագրել ինձ Ադրբեջանին հանձնելու հրամանը՝ որպես լրագրող Արցախ այցելելու համար։
Լապշինը շնորհակալություն է հայտնել Հայաստանի դատախազությանը, իրեն չձերբակալելու և Բելառուսին չհանձնելու համար։